Ndërsa pandemia e Covid 19-ës me shpresë po përfundon, kërkesa globale për arin e lëngët po rritet. Kjo kërkesë nuk po plotësohet nga kompanitë e naftës të cilat, nga ana e tyre, po njoftojnë një reduktim të prodhimit përballë "presionit të gjelbër" global.

Prandaj shtrohet pyetja, a i ka ardhur fundi epokës së naftës dhe lëkundja e çmimeve është një shenjë e saj?

Banka amerikane e investimeve Goldman Sachs vlerëson se çmimi i një fuçie mund të arrijë vlerën e 100 USD deri në fund të vitit 2021, çmim i cili u pa për herë të fundit në vitin 2014.

Ky kërcim mund të pritet për shkak të shenjave tashmë të dukshme të një rritje të mprehtë të kërkesës për naftë dhe derivateve të saj këtë pranverë - me vaksinimin masiv, rritjen e aktivitetit ekonomik në shumë vende të mbingarkuara dhe kthimin e udhëtimeve turistike nëpër botë.

Në të njëjtën kohë, ndërmarrjet e mëdha të naftës pretendojnë se ekziston një arsye sistemike pse nafta mund të bëhet më e shtrenjtë në këtë dekadë. Arsyeja është e thjeshtë dhe e imponuar si një domosdoshmëri globale sociale - reduktimi i emetimeve të karbonit.

Situata e Naftës në Vende të Ndryshme

IEA (Agjencia Ndërkombëtare e Energjisë) njoftoi se "bota do të ketë nevojë për shumë më shumë naftë sesa lejon OPEC Plus, pasi kërkesa globale për fuçi do të kthehet në sasitë e para Covid-it". Dhe më pas, pranverën e kaluar, "OPEC Plus" befasoi me një vendim për të mbajtur rezervat e saj deri në Prill 2022, dhe kështu i mohoi tregut gati gjashtë milion fuçi naftë të prodhuar në ditë.

Arabia Saudite dhe Rusia kanë njoftuar tashmë se do të punojnë paralelisht në dy fronte: investime të mëtejshme në industrinë e naftës dhe prodhimin e gazit natyror e të lëngshëm, si dhe burimet e ripërtëritshme të energjisë.

Tashmë gjashtë vende kanë kaluar në ligj synimet e tyre neutrale ndaj karbonit. Ato përfshijnë Suedinë, Danimarkën, Francën, Hungarinë, Zelandën e Re dhe MB. Pesë vende të tjera kanë propozuar këtë legjislacion, duke përfshirë Kanadanë dhe Korenë e Jugut, si dhe tërësinë e BE.

Ndërgjegjësimi i njerëzve për ndotjen globale po rritet. Tashmë të gjithë bien dakord se është e nevojshme të fillohet investimi në këtë drejtim sa më shpejt të jetë e mundur dhe të zhvillohet më tej teknologjia që do të jetë në gjendje të zëvendësojë plotësisht përdorimin e naftës dhe derivateve të naftës në mënyrë që të arrihen emetime zero të gazrave të dëmshëm deri në vitin 2050.